1-р зарчим: Булчингийн хэт ядралыг бий болгох ёстой. Ингэснээр таны булчингийн эс ачаалал даах чадвартай болохын тулд эзлэхүүнээ тэлж томорно. Булчингийн хэт ядрал нь их хэмжээний булчингийн өвдөлтөөр мэдрэгдэнэ. Тэгэхлээр та булчингийнхаа өвдөлтийг давах хэрэгтэй болно. Жич: Өвдөлт нь булчингийн булрааны өвдөлт биш дасгалын үе дэх булчингийн чинэрэл гэдгийг санах хэрэгтэй.

2-р зарчим: Дасгалыг хэт хүнд жингээр хийх хэрэггүй. Зөвхөн та өөртөө тохирсон жингээр дасгалуудыг зөв техниктэй гүйцэтгэж байх хэрэгтэй. Ингэснээр таны булчин түргэн хөгжих болно. Хэт хүнд жингээр дасгалыг хийхэд олон давтаж чаддаггүй ба булчингийн хэт ядралыг үүсгэж чаддаггүй. Харин таны хүчний үзүүлэлт өсөж болно. Ялангуяа анхлан хичээллэгсдэд хүнд жинг авахгүй байхыг зөвлөе. Хүнд жин авснаар таны хөгжих бус гэмтэх эрсдэл ихтэй.

3-р зарчим: Илчлэг ихтэй чанарлаг хоолоор хооллож байх хэрэгтэй. Өөх тосыг хэтрүүлэн хэрэглэвэл таны биед өөх хуримтлагдах аюултайгаас гадна судасны хатуурах өвчин үүсэх магадлалтай. Таны хоолны цэсэнд олон төрлийн хоол, уургаар баялаг хүнсний бүтээгдэхүүн байвал нэн сайн. Ингэснээр та өөрт хэрэгтэй шимт бодисуудыг хангалттай хэмжээгээр авах ба таны булчин түргэн хөгжих болно.

4-р зарчим: Булчингаа хангалттай хэмжээнд амрааж байх хэрэгтэй. Та өдөрт дор хаяж 8-н цаг унтаж байх ёстой. Ингэснээр таны булчин хангалттай амрах ба дараагийн ачаалалд бүрэн бэлтгэгдсэн байдаг. Дутуу амарсан булчин нь ачаалал авах чадвар муу байдаг тул хөөлт бага авдаг.

5-р зарчим: Дасгалын төлөвлөгөөгөө зөв боловсруулах хэрэгтэй. Ингэснээр та булчингуудынхаа амралтуудыг зөв зохицуулах ба таны булчин амархан хөгжихөд дэм болно.